假使楊千嬅得影后
假使楊千嬅得影后
14/04/2013
這是兩年前,楊小姐第一次憑《志明與春嬌》提名香港電影金像獎最佳女主角時,我與友人的對話。
「嘩,楊千嬅有得提名最佳女主角呀!」我說。
友人甲問:「真架?有咩對手?」
友人乙說:「論資排輩應該係劉嘉玲,不過《狄仁傑》極其量只能當係配角。其餘的,雖然我鍾意湯唯,但都無佢做得咁好。」
友人甲說:「楊小姐做得好?整套戲在打煙炮,連一句粗口都無講過,唔係好MATCH套戲。不過我覺得重點唔係佢有無得攞影后,而係佢攞咗影后,當日撼頭埋地板都攞唔到嘅鄭小姐會有乜反應。」
我大笑一聲:「唔……唔……藐囉。不過佢家陣有耶蘇,應該唔會藐掛。」
最終,我們的結論是,如果楊小姐攞了最佳女主角,那麼,鄭小姐會先藐佢然後,求其搵個人嫁咗佢(那時還未和許先生復合),再宣佈退出影壇。
當然,那一屆得獎的是劉小姐,故我們的預言未有成立。但今屆,楊小姐在大熱情況下取得后冠,鄭小姐在螢光幕前的表現確是落落大方的。
不過,還有後話,雖然個人以為今屆楊千嬅憑《春嬌與志明》得獎,在這樣的對手(沒有像去年有個《桃姐》的前輩在),加上近年各地影展傾向把獎項留給本地選手(大家還記得那幾年,在一連串鞏俐、章子怡、周迅、斯琴高娃等國內佳麗得到這個獎之後,突然有一年,獎項回到香港演員鮑姐身上時那種喜悅嗎?),之下,楊小姐得獎,還是憑喜劇,我覺得是實至名歸。
可是獎一頒了,依例有不滿的留言,留言終之係:楊小姐得獎,係香港的恥辱、香港影壇一籌莫展、佢永遠得一個表情、佢做返自己之嘛……我實在有點東西是不明白的:
1.我覺得既然今年奧斯卡, Jennifer Lawrence 都可以攞,楊小姐又點解唔可以攞呢?
2.個個話佢做返自己,講到似層層,好似同佢住埋一齊咁,其實,講嘅又有幾個真係楊小姐嘅朋友,佢真人係點,又有邊個知?《新紮師妹》佢做自己、《抱抱俏佳人》又係自己、《乾柴烈火》又係做自己……佢又有幾多個自己?
3.的確,論演技,楊小姐可說是不及葉德嫻、鮑姐、DODO姐、金燕玲、張艾嘉、羅蘭姐……但是香港總不能永遠是老戲骨得獎吧!
4.的確有鄭小姐FANS存在的,但比較起兩套戲,《春嬌與志明》中的偷情港女與《高海拔之戀》的阿秀相比,楊小姐今次的確是做到那種香港女仔的倔強、克苦、唔衰得的樣子。鄭小姐有過她的風光時間,那是2002年的金像獎,如不是她一年有三套戲提名把票源分散,我覺得她在《鍾無艷》的表現是超群的。(可這是遊戲規則。)
無論如何,我覺得既然獎都頒了,而香港影壇近年又真的是不及台灣、韓國及大陸的電影,那麼拍的還是繼續努力,觀眾還是多點支持。借用當年張曼玉憑《阮令玉》,第二次獲得最佳女主角時屆所說:「依家個獎喺我手,任你講乜都唔關我事,我唔理。」(當年張小姐仍未成為傳奇時,早憑《不脫襪的人》得過影后,贏了馮寶寶、張艾嘉、劉嘉玲,事後當然畀人評佢未夠班啦!)